റേഞ്ച്

റേഞ്ച് നോക്കി ഞാൻ ഏറെ ദൂരം നടന്നു. എത്തിപ്പെട്ടത് ഒരു ഉൾനാടൻ ഗ്രാമത്തിൽ. ക്ഷീണം കൊണ്ട് ഒരു കടത്തിണ്ണയിൽ ഇരുന്നു. എന്തു ചെയ്യുമെന്ന് ആലോചിച്ചിരിക്കുമ്പോൾ, തലയ്ക്കു മീതെ ചുമരിനോട് ചേർന്ന് കിടക്കുന്ന തപാൽ പെട്ടി കണ്ണിൽ പെട്ടു. ചിന്ത പിന്നെ അതിനെ കുറിച്ചായി. എന്തുകൊണ്ട് എനിക്ക് ഇത് ഉപയോഗിച്ചുകൂടാ.. ഇതിനു റേഞ്ച് പ്രശ്നം അല്ലല്ലോ !


ഒട്ടും വൈകിയില്ല, അടുത്തുള്ള തപാൽ ആപ്പീസിൽ നിന്ന് ഒരു ഇൻലൻഡ് വാങ്ങി. പോക്കറ്റിൽ ഇരുന്ന പേനക്ക് പുത്തൻ തിളക്കം. ചുമ്മാ വായിച്ചിരിക്കാൻ വേണ്ടി വാങ്ങിച്ച മാസികയുടെ മുകളിൽ ഇൻലൻഡ് നിവർത്തി വെച്ച് എഴുതാൻ തുടങ്ങി.. അതു വരെ വിരലുകൾ കൊണ്ട് മാത്രം ആശയങ്ങൾ കൈമാറിയ ഞാൻ അപ്പോൾ  മുതൽ എപ്പോഴൊക്കെയോ മറന്നു പോയ ഒരു അനുഭവം വീണ്ടും അടുത്തറിയുകയായിരുന്നു.

മനസ്സിലെ ആശയങ്ങൾ നമ്മുടെ വരികളിലൂടെ സ്വന്തം കൈപ്പടയിൽ എഴുതുമ്പോൾ അനുഭവിച്ചിരുന്ന ഒരു ആനന്ദം, സമാധാനം ഒന്നും ഈ റേഞ്ച് തപ്പിപ്പോകുന്ന മൊബൈലിൽ നിന്ന് കിട്ടുമായിരുന്നില്ല.


എല്ലാം എഴുതി അവസാനം ഇൻലണ്ടിന്റെ മൂന്ന് അരികും പശ വെച്ച് ഒട്ടിച്ചു ആ തപാൽ പെട്ടിക്കുള്ളിൽ ഇട്ടപ്പോൾ എന്തെന്നില്ലാത്ത ഒരു സന്തോഷം മനസ്സിനനുഭവപ്പെട്ടു. അപ്പോഴും കയ്യിലുണ്ടായിരുന്ന പൊൻപണം കൊണ്ട് വാങ്ങിച്ച മൊബൈൽ റേഞ്ച് കിട്ടാനുള്ള നെട്ടോട്ടത്തിൽ ആയിരുന്നു.. ഞാൻ ചുമ്മാ ചിരിച്ചു കൊണ്ട് നടന്നു നീങ്ങി.

Ash..